مبادرة العمال والفلاحون يكتبون الدستور: "نحو وثيقة للحقوق الاقتصادية والاجتماعية".. تحت شعار "جه دورك تكتب دستورك"
حقوق اجتماعية سكن ضمان اجتماعى

مبادرة العمال والفلاحون يكتبون الدستور: "نحو وثيقة للحقوق الاقتصادية والاجتماعية".. تحت شعار "جه دورك تكتب دستورك"

الدستور: هو أعلى قانون فى الدولة، ولازم كل القوانين وقرارات الوزراء والمحافظين متخالفش نصوصه، الدستور هو اللى بيحدد شكل الدولة وسلطات الرئيس، ومجلس الشعب، والوزراء، وكمان حريات المواطن الشخصية والسياسية، وإزاى يحمى كرامته ومحدش يعذبه أو يهينه أو يعتدى على حقوقه لمجرد إنه فقير ومن الحاجات المهمة كمان واللى بيحددها الدستور الحقوق الاقتصادية والاجتماعية للمواطن، زى: الأكل، والسكن، والشغل، والعلاج، والتأمين والضمان الإجتماعى، والتأمين الصحى، والتعليم، وسلامة البيئة، والحفاظ على المال العام، وحماية ثروات المجتمع (من أرض، ومياه، وبحور، وشواطىء، ومناجم، ومحاجر، وبترول وذهب.. الخ ) وضمان توزيع عادل لها بشكل يضمن حياه كريمه لكل مواطن، وغيرها من الحقوق.. إلخ.

وعشان أهمية الموضوع كل الأحزاب والقوى السياسية من دلوقتى بتكتب هيا عايزه إيه فى الدستور الجديد.

وهنا طرحنا على نفسنا سؤال:

 ينفع العمال والفلاحين والصيادين وكل أصحاب المهن البسيطة، وأصحاب المعاشات، والفقراء والمهمشين يفضلوا ساكتين ويشفوا الأحزاب هتكتب إيه؟

كانت إجابتنا لو سكتنا هنبقى سلبيين،  لازم نشارك فى الدستور من دلوقتى، ونقول إحنا عايزين إيه من الحقوق تكون فيه، وكل أحلامنا ومطالبنا هنسلمها للجنة التأسيسية اللى هتكتب الدستورعشان متعملش حاجه عكس اللى إحنا عايزنها.

إكتب على ضهر الورقة دى أو فى أى ورقة تانية إنت عايز إيه من الدستور؟ وابعتهولنا على العناوين المكتوبة بالخلف.

شارك معانا، وأوعى تكون سلبى عشان منرجعش نندم بعد كدا، وزع الورقة دى على كل صحابك وأهلك اتكلموا فى القهوة أو الشغل أو البيت، واللى يسألك قول له

” جه دورك ..تكتب دستورك”

اكتب أحلامك ومطالبك مهما كانت بسيطة، البلد دى بلدنا، وإحنا اللى هنحميها، واحنا اللى هنقول عايزنها تبقى إزاى، اكتب هنا:

إبعت على أى من العناوين التالية:

6 ش مديرية التحرير متفرع من القصر العينى – جاردن سيتى- الدور الخامس- الاتحاد المصرى للنقابات المستقلة.

أو 1 ش سوق التوفيقية  – الإسعاف – القاهرة- الدور الرابع- المركز المصرى للحقوق الاقتصادية، ت 01201888977- 01002019347

إحنا مين

إحنا مجموعات من العمال والفلاحين وأصحاب المهن البسيطة وأصحاب المعاشات ونقاباتهم ومنظمات مجتمع مدنى عملنا مبادرة إسمها “العمال والفلاحون يكتبون الدستور” هنلف المحافظات والمدن والقرى نسأل أهلنا وأصحابنا “إحنا عايزين إيه من الدستور فى حقوقنا الاقتصادية والاجتماعية؟” المبادرة دى مش بتاعة حد، ولا ملك حد، دى ملك اللى يشارك فيها ، فكر فى المبادرة، وشارك فيها بفاعليه علشان ولادنا وبلادنا.

Leave feedback about this